Urola Kostako Hitza

2008-04-24 | 13:33:24

Ekainaren 2tik aurrera Aiak autobus zerbitzu hobea izango du

Aiako Udalak, Eudelek, Urkomek eta Gipuzkoako Foru Aldundiak finantzatuko dute proiektu aitzindari hau

Ekainaren 2tik aurrera aiarrek autobus zerbitzu hobea izango dute. Xehetasunak eman dituzte gaur goizean, besteak beste, Gipuzkoako Ahaldun Nagusi Markel Olanok eta Aiako alkate Igor Iturainek. Iturainen esanetan zerbitzu berri honi esker "Aia Zarautzekin lotuko da eta auzoetan geldioaldi ugari izango ditu". Bai Olanok bai Iturainek landa eremuko herrietara zuzendu den zerbitzu berriak izango duen "malgutasuna" azpimarratu dute. Urtebete iraungo du proiektu aitzindari honek eta helburuak betetzen badira Gipuzkoako beste udalerri txiki batzuetan jarriko da martxan. Iturainek adierazi duenez, Aiako Udalaren helburua "zerbitzu hau egonkortzea da eta ez urtebetera mugatzea".

Ez du erantzunik

2008-04-15 | 11:51:44

Sortzen Ikasbatuaz elkarteak festa egingo du igandean Aian

'Bultza euskal hezkuntza' lelopean egun osoko jaia antolatu du Lardizabal eskolaren laguntzarekin

Igandean Sortzen Ikasbatuaz elkarteak festa egingo du Aian. Aurreneko aldia da Gipuzkoan egingo dena, eta maiatzaren 18an Iruñean ospatuko duten Nazio Festaren aurrekaria izango dela adierazi dute antolatzaileek. Belen Zabala Lardizabal herri eskolako irakasleak dei egin die herritarrei festan parte hartzeko. Eurak festa antolatzen laguntzen ari dira eta igandean irakasle eta ikasle talde batek ongietorri moduan zenbait kanta abestuko dizkiete Aiara hurbiltzen direnei. Egitarauaren barruan, besteak beste, mendi ibilaldia, bertsolariak,hainbat ikastetxetako kideen ikuskizuna, herri kirolak, bazkaria, pailazoak eta erromeria egongo dira.

Ez du erantzunik

2008-04-07 | 13:06:24

Nerea Amilibia nagusitu da mendi maratoiko Euskadiko Txapelketan

Atzo Gasteizko Mendietan egindakoarekin "pozik" agertu da aiarra

Nerea Amilibiak "gustura" egin zituen atzo maratoiko 42 kilometro eta 185 metroak. Gainera eguraldi ederra tokatu zitzaien eta "sekulako ikuspegiaz gozatu" ahal izan zutela adierazi du. Ibilbidea "polita" zen arren 25. kilometrora arte jatekorik ez zietela eman kritikatu du aiarrak eta agian horregatik amaitu zutela proba 9 emakumetatik lauk bakarrik. Datorren asteburuan deskantsatu ondoren hurrengoan Aloñako proban parte hartzeko asmoa du Amilibiak.

Ez du erantzunik

2008-04-02 | 16:36:58

Mikel Markez: "Nire ibilbide osoaren laburpen bat da bilduma disko hau"

Bihar goizean aurkeztuko du "Zure begiek bilduma 1988-2008" diskoa eta Aian emango du aurreneko kontzertua larunbat gauean

Bere zortzigarren lana kaleratuko du bihar Mikel Markez bakarlariak. 20 urte daramatza abesten eta urte horietako lanaren laburpena egin nahi izan du disko honekin. Larunbatean emango du aurreneko kontzertua Aiako plazan, 22:30etik aurrera; kontzertuak ematen hasteko "gogotsu" agertu da. Disko hau "asko mimatutako diskoa" dela eta duten "guztia jarri" dutela adierazi du. "Abesti batzuei bizitza berria eman eta haiek berriz jendeari aurkeztu nahi izan dizkiot", esan du Markezek. Hamalau abesti biltzen ditu diskoak eta hautaketa "zaila" izan dela nabarmendu du. Jendeak "gustukoen" dituen abestiak sartu ditu diskoan. Biharko paperezko HITZAn irakurri ahal izango da elkarrizketa osoa.

Ez du erantzunik

2008-03-12 | 16:44:51

Garmendia izan da nagusi Aiako idi proba lehiaketan

Atzo gauean amaitu zen lehia eta eskualdeko lau idi pareek ezin izan zuten aurreneko posturik lortu

Garmendia izan da garaile Aiako idi proba norgehiagokan 46 plaza eginda. Bigarren Zerain izan da 44 plazarekin eta hirugarren, berriz, Laski, 43 plazarekin. Eskualdeko lau idi pare ere aritu ziren lehian baina ez zuten emaitza onik lortu. Ondoen Letea jatetxea ibili zen, 40 plaza egin baitzituen, bosgarren postua eskuratuz. Eusebio Arzadun seigarren izan zen 38 plazarekin, Izeta Anaiak hamabigarren izan ziren 28 plazarekin eta Izeta, berriz, azken postuan gelditu zen 24 plaza eginda.Amaieran omenaldia egin zioten idiekin ez zuen zorte handirik izan oraingo honetan. Lau egun iraun du asteartean amaitu zen lehia honek. Orokorrean probak ikustera jende asko etorri ez bada ere, antolatzaileak gustura gelditu dira azken egunean jende asko hurbildu zelako.

Ez du erantzunik

2008-03-12 | 14:47:55

Apirilean hasiko dira merkataritza eraikina egiten Armendi Gainen

Urtebeteko epean amaituta egongo dela espero du Udalak, eta oraindik lau lokal eta bost trasteleku salgai daudela adierazi du

Armendi Gainen merkataritzarako eraikin bat egingo du Udalak. Eraikin horretan farmazia, okindegia eta ileapaindegia egongo direla adierazi du Udalak, eta oraindik beste lau lokal eta bost trasteleku salgai daudela gaineratu du. Okindegiak kafetegia eta gozotegia ere bilduko ditu bere baitan. Proiektua udaletxean dago ikusgai. Lanak apirilean hasiko dira eta lehenengo faseko lanak Saiatu enpresari esleitu dizkio. Fase honek 473.932,96 euroko aurrekontua izango du, eta guztira 912.259,38 euro gastatuko dira proiektu honetan. Lokal eta trasteleku hauekiko interesa duenak 943212354 telefonora dei dezake.

Ez du erantzunik

2008-03-06 | 13:13:11

Bihartik asteartera bitartean idi probak izango dira

Asteartean, sariak banatu ondoren, antolatzaileek omenaldi 'xume' bat egingo diote Manuel Iruretagoiena 'Izeta'ri

Bihar ostirala hasi eta asteartera bitartean idi probak izango dira gauero, igandean izan ezik. 22:00etan hasiko dira eta eskualdetik Izeta eta Izeta Anaiak aiarrek eta Letea Jatetxea errezildarrak hartuko dute parte. Astearte gauean Aiako Probazaleen Elkarteak Manuel Iruretagoiena 'Izeta' omenduko du "idi dema munduan aritu den urte guztiengatik". Martxoak 7, bihar -Izeta Anaiak (Aia). -Laski (Billela). -Telleria (Lasarte-Oria). Martxoak 8, etzi -Ipinarrieta (Urretxu). -Lopategi (Billela). -Julian Subinas (Itziar) -Matxain (Errenteria). Martxoak 10, astelehena -Eusebio Arzadun (Aia). -Artola (Lasarte-Oria). -Zerain (Lasarte-Oria). Martxoak 11, asteartea -Garmendia ( Belauntza). -Letea Jatetxea (Errezil). -Izeta (Aia).

Ez du erantzunik

2008-03-03 | 12:13:02

Izeta II: "Aimar Irigoienen mailako harri-jasotzaile gehiago ere badagoela erakutsi dugu"

Izeta II nagusitu da Loiun Aimar Irigoienen, Izeta III-aren eta Ostolazaren aurrean

Eskualdeko lau harri-jasotzaileen arteko lehiaketa izan zen atzo Loiun (Bizkaia) eta Aimar Irigoienek eta Jose Ramon Iruretagoiena Izeta II-k berdinketa egin zuten; gutxien pisatzen zuenari eman zioten txapela antolatzaileekAtzo Loiun jokatu zen harri-jasotze lehiaketan Izeta II nagusitu zen baina doi-doi irabazi zuen, Irigoienek eta berak 62na altxaldi egin zituztelako 125 kiloko harri zilindrikoarekin eta kubikoarekin. Hirugarren Ostolaza sailkatu zen 59 jasoaldirekin eta laugarren, berriz, Izeta III.a 52 jasoaldirekin. Izeta II: "Aimar Irigoienen mailako harri-jasotzaile gehiago ere badagoela erakutsi dugu"

Ez du erantzunik